Weather Alert श्रावण महिन्याच्या दुसऱ्या आठवड्यापासून महाराष्ट्रात पावसाचा जोर वाढलेला दिसतो आहे. काही जिल्ह्यांमध्ये मुसळधार ते अतिमुसळधार पाऊस होत असताना, अजूनही काही शेतकरी पावसाच्या प्रतिक्षेत आहेत. मागील दोन दिवसांपासून पावसाची तीव्रता पुन्हा वाढली आहे. हवामान विभागानं 18 ऑगस्टसाठी राज्यातील अनेक जिल्ह्यांना रेड, ऑरेंज आणि यलो अलर्ट जारी केला आहे.
कोकण विभाग
मुंबई, ठाणे, पालघर आणि सिंधुदुर्ग जिल्ह्यांत मुसळधार ते अति मुसळधार पावसाचा इशारा देण्यात आला असून या भागांसाठी ऑरेंज अलर्ट जारी केला आहे. रायगड आणि रत्नागिरी जिल्ह्यांमध्ये अतिमुसळधार पावसाची शक्यता असल्याने रेड अलर्ट दिला गेला आहे.
पश्चिम महाराष्ट्र
पुणे, कोल्हापूर आणि सातारा घाटमाथा परिसरात जोरदार ते अति मुसळधार पाऊस होण्याचा अंदाज आहे. त्यामुळे या जिल्ह्यांना रेड अलर्ट देण्यात आला आहे. तर पुणे, सातारा आणि सोलापूर जिल्ह्यांसाठी मुसळधार पावसाचा यलो अलर्ट देण्यात आला आहे. सांगली आणि कोल्हापूर जिल्ह्यांत मध्यम पावसाचा अंदाज आहे.
मराठवाडा
मराठवाड्यातही पावसाची तीव्रता वाढली आहे. छत्रपती संभाजीनगर, बीड, लातूर आणि जालना या जिल्ह्यांत मुसळधार ते अति मुसळधार पावसाची शक्यता असल्याने ऑरेंज अलर्ट जारी करण्यात आला आहे. परभणी, हिंगोली, नांदेड आणि धाराशिव जिल्ह्यांत वादळी वाऱ्यासह पाऊस पडण्याची शक्यता असून या जिल्ह्यांसाठी यलो अलर्ट देण्यात आला आहे.
उत्तर महाराष्ट्र
नाशिक, धुळे, नंदुरबार आणि अहमदनगर जिल्ह्यांत विजांच्या कडकडाटासह पावसाचा अंदाज व्यक्त करण्यात आला आहे आणि त्यासाठी यलो अलर्ट जारी केला आहे. तर जळगाव जिल्ह्यासाठी मुसळधार ते अति मुसळधार पावसाचा ऑरेंज अलर्ट देण्यात आला आहे.
विदर्भ
विदर्भातील नागपूर, अकोला, भंडारा, गोंदिया, बुलढाणा, वर्धा, वाशिम आणि यवतमाळ जिल्ह्यांत विजांसह मुसळधार पाऊस पडण्याची शक्यता आहे आणि हवामान विभागाने या जिल्ह्यांना यलो अलर्ट दिला आहे. अमरावती, चंद्रपूर आणि गडचिरोली जिल्ह्यांत मुसळधार ते अति मुसळधार पाऊस होण्याची शक्यता असल्याने ऑरेंज अलर्ट जारी करण्यात आला आहे.
नागरिक आणि शेतकऱ्यांना सूचना
18 ऑगस्ट रोजी राज्यातील विविध भागांत मुसळधार पावसाची शक्यता असल्यामुळे नागरिकांनी अनावश्यकपणे बाहेर पडणे टाळावे. विजांच्या कडकडाटात सुरक्षित ठिकाणी आसरा घ्यावा. शेतकऱ्यांनी पिकांचे संरक्षण करण्यासाठी आवश्यक ती काळजी घ्यावी, असे आवाहन हवामान विभागाने केले आहे.
Disclaimer: या लेखातील माहिती हवामान विभागाच्या अंदाजांवर आधारित आहे. हवामान परिस्थिती बदलू शकते. वाचकांनी निर्णय घेताना स्थानिक प्रशासन आणि हवामान विभागाच्या अद्ययावत सूचनांचा आधार घ्यावा.
